कलशधारी महिला, टाळ मृदूंगाचा निनाद, फटाक्यांची आतषबाजी, नामस्मरणाच्या जयघोषाने सप्ताहाला प्रारंभ
युवावार्ता (प्रतिनिधी)
संगमनेर अधिकमासाच्या पावन पर्वानिमित्त गुंजाळवाडी येथे सोमवार दि. ८ जूनपासून सुरू होत असलेल्या परमपूज्य श्री स्वामी गगनगिरी महाराज अखंड हरिनाम सप्ताहाच्या शुभारंभाने संपूर्ण परिसर भक्तिमय वातावरणात रंगून गेला. हजारो भाविकांच्या उपस्थितीत काढण्यात आलेल्या भव्य आणि दिव्य मिरवणुकीमुळे गुंजाळवाडीसह परिसरात भक्ती, श्रद्धा आणि नामस्मरणाचा अखंड गजर दुमदुमला.सप्ताह मार्गावर उभारण्यात आलेल्या आकर्षक स्वागत कमानी, सर्वत्र डौलाने फडकणाऱ्या भगव्या पताका, रांगोळ्यांनी सजलेले रस्ते आणि “विठ्ठल… विठ्ठल…” च्या अखंड जयघोषाने संपूर्ण वातावरण अध्यात्मिक ऊर्जेने भारावून गेले होते. प्रत्येक भाविकाच्या चेहऱ्यावर भक्तीचा आनंद आणि स्वामींच्या चरणी असीम श्रद्धा दिसून येत होती.
संगमनेर बसस्थानक परिसरातील दत्त मंदिरापासून सकाळी साडेदहा वाजता मिरवणुकीस प्रारंभ झाला. महिला भगिनींनी डोक्यावर मंगलमय कलश धारण करत भक्तिभावाने सहभाग नोंदविला. हजारो वारकरी, भाविक आणि ग्रामस्थांनी टाळ-मृदंगाच्या गजरात हरिनामाचा जयघोष करत मिरवणुकीला अलौकिक स्वरूप प्राप्त करून दिले.
फुलांनी आणि आकर्षक सजावटीने नटलेल्या रथामध्ये विराजमान असलेल्या परमपूज्य श्री स्वामी गगनगिरी महाराजांच्या मूर्तीचे दर्शन घेण्यासाठी भाविकांनी एकच गर्दी केली होती. फटाक्यांची आतषबाजी, ढोल-ताशांचा निनाद, टाळ-मृदंगाचा ताल आणि “ज्ञानोबा-तुकाराम”, “विठ्ठल विठ्ठल जय हरी विठ्ठल” या गजराने अवघा परिसर भक्तिसागरात तल्लीन झाला होता. जवळपास दोन तास चाललेल्या या भव्य मिरवणुकीचा समारोप सप्ताहस्थळी अत्यंत उत्साहपूर्ण वातावरणात झाला.मिरवणुकीनंतर परमपूज्य श्री स्वामी गगनगिरी महाराजांच्या मूर्तीची वैदिक मंत्रोच्चारात विधिवत स्थापना व घटस्थापना करण्यात आली. त्यानंतर ज्ञानेश्वरी पारायणास प्रारंभ झाला. ह.भ.प. उमेश महाराज दशरथे यांच्या प्रभावी कीर्तनातून भक्तांना अध्यात्म, सदाचार आणि नामस्मरणाचा अमूल्य संदेश मिळाला. तसेच हरिपाठाच्या माध्यमातून भक्तांनी विठ्ठलनामाचा अखंड जप केला.
सायंकाळी सात वाजता ह.भ.प. रामराव महाराज ढोक यांच्या रसाळ आणि ओघवत्या रामायण कथेचा प्रारंभ झाला. प्रभू श्रीरामांच्या चरित्राचे श्रवण करताना हजारो भाविक भावविभोर झाले. रामकथेतील आदर्श, भक्ती आणि संस्कारांचे दर्शन घडवत या कार्यक्रमाने उपस्थितांना आध्यात्मिक आनंदाची अनुभूती दिली.
सप्ताहाच्या या मंगलमय प्रारंभामुळे गुंजाळवाडी परिसरात भक्ती, श्रद्धा, नामस्मरण आणि अध्यात्माचा दिव्य संगम अनुभवास येत असून पुढील सात दिवस विविध धार्मिक कार्यक्रमांमधून भाविकांना आध्यात्मिक पर्वणी लाभणार आहे. स्वामी गगनगिरी महाराजांच्या कृपाशीर्वादाने आणि विठ्ठलनामाच्या गजराने संपूर्ण परिसर भक्तिमय वातावरणात न्हाऊन निघाला आहे.
गगनगिरी महाराजांच्या विचारांतून सकारात्मक ऊर्जा मिळेल : आबासाहेब थोरात
गुंजाळवाडीत आयोजित परमपूज्य श्री स्वामी गगनगिरी महाराज अखंड हरिनाम सप्ताहाच्या निमित्ताने काढण्यात आलेल्या भव्य मिरवणुकीला भाविकांचा उत्स्फूर्त प्रतिसाद लाभला. हजारोंच्या उपस्थितीत निघालेल्या या मिरवणुकीने गावातील ऐक्य, सामाजिक बांधिलकी आणि गावपणाचे दर्शन घडविले. मंदिराच्या माध्यमातून संपूर्ण गाव एकत्र येत असल्याचे प्रेरणादायी चित्र यावेळी पाहायला मिळाले.
यावेळी उपस्थितांना मार्गदर्शन करताना उद्योजक तथा स्वामी गगनगिरी महाराजांचे भक्त आबासाहेब थोरात म्हणाले की, हा सप्ताह केवळ धार्मिक कार्यक्रम नसून भाविकांसाठी विचारांची आणि अध्यात्माची पर्वणी आहे. आगामी कुंभमेळ्याच्या पूर्वतयारीचा एक भाग म्हणून या सप्ताहाकडे पाहता येईल. आजच्या काळात समाजमाध्यमांवरील अनावश्यक गोष्टींमध्ये वेळ घालविण्यापेक्षा संत-महात्म्यांचे विचार, त्यांचे कार्य आणि अध्यात्मिक संदेश समजून घेणे अधिक गरजेचे आहे.
स्वामी गगनगिरी महाराजांच्या विचारांत आणि कार्यात अपार ऊर्जा असून त्यांची अद्भुत शक्ती प्रत्येकाच्या जीवनात सकारात्मकता निर्माण करेल, असा विश्वासही त्यांनी व्यक्त केला. गेल्या अडीच महिन्यांपासून सप्ताहाच्या नियोजनासाठी सुरू असलेल्या तयारीत गावातील नागरिक, युवक, महिला, विविध संस्था तसेच तालुक्यातील भाविकांनी मनापासून सहभाग नोंदविला. प्रत्येकाने आपल्या परीने योगदान दिल्यामुळे हा सोहळा भव्य स्वरूपात साकार झाला आहे.
या सप्ताहाच्या यशस्वी आयोजनासाठी प्रत्यक्ष किंवा अप्रत्यक्ष सहकार्य करणाऱ्या सर्व ग्रामस्थ, कार्यकर्ते, देणगीदार आणि भाविकांचे आबासाहेब थोरात यांनी मनःपूर्वक आभार मानले.
स्वामी गगनगिरी महाराजांचे जीवन म्हणजे तप, त्याग आणि लोककल्याणाची प्रेरणा : दिलीप शिंदे
गुंजाळवाडी येथे सुरू असलेल्या परमपूज्य स्वामी गगनगिरी महाराज अखंड हरिनाम सप्ताहाच्या निमित्ताने आयोजित कार्यक्रमात उद्योजक दिलीप शिंदे यांनी स्वामी गगनगिरी महाराजांच्या जीवनकार्याचा गौरवपूर्ण आढावा घेतला. महाराजांचे संपूर्ण आयुष्य हे कठोर तपश्चर्या, अध्यात्मिक साधना आणि समाजकल्याणासाठी समर्पित असल्याचे त्यांनी नमूद केले.यावेळी बोलताना शिंदे म्हणाले की, स्वामी गगनगिरी महाराजांचे व्यक्तिमत्त्व केवळ एका संतपुरुषापुरते मर्यादित नसून ते भक्तांसाठी एक प्रेरणादायी आध्यात्मिक शक्तिकेंद्र आहे. त्यांनी आयुष्यभर केलेली साधना, त्याग आणि मानवसेवा आजही लाखो भक्तांना मार्गदर्शन करणारी ठरत आहे.
महाराजांच्या कार्याची व्याप्ती इतकी मोठी आहे की त्यांच्या कुळापेक्षा त्यांचे कार्य आणि भक्तांवरील कृपाशिर्वाद हाच त्यांचा खरा परिचय आहे. त्यांच्या जीवनातून संयम, सेवा, श्रद्धा आणि भक्तीचा संदेश समाजाला मिळाला आहे. त्यामुळेच आजही त्यांच्या विचारांमधून आणि कार्यातून असंख्य भाविकांना प्रेरणा मिळत असल्याचे त्यांनी सांगितले.स्वामी गगनगिरी महाराजांच्या आगमनाने आणि स्मरणाने कोणतीही भूमी पावन होते. ज्या ठिकाणी नामस्मरण, भक्ती आणि सेवाभाव असतो, तेथे महाराजांची कृपादृष्टी कायम राहते. या सप्ताहाच्या माध्यमातून भाविकांना अध्यात्मिक उन्नतीची संधी मिळत असून परिसरात भक्ती आणि श्रद्धेचे वातावरण निर्माण झाले आहे, असेही शिंदे यांनी नमूद केले.
स्वामी गगनगिरी महाराजांच्या विचारांचा वारसा जपण्यासाठी आणि त्यांच्या कार्यातून प्रेरणा घेण्यासाठी प्रत्येकाने भक्ती, सदाचार आणि समाजसेवेचा मार्ग स्वीकारावा, असे आवाहनही त्यांनी यावेळी केले.
हरिनाम सप्ताहातून भक्ती, संस्कार आणि नवचैतन्याचा संदेश : नीलम खताळ
परमपूज्य स्वामी गगनगिरी महाराज अखंड हरिनाम सप्ताहाच्या प्रारंभामुळे संगमनेर परिसरात भक्तिमय आणि उत्साहपूर्ण वातावरण निर्माण झाले आहे. गेल्या अनेक महिन्यांपासून भाविक ज्या सोहळ्याची आतुरतेने प्रतीक्षा करत होते, त्या सप्ताहाच्या शुभारंभाने संपूर्ण परिसर हरिनामाच्या गजरात दुमदुमून गेला आहे. गगनगिरी महाराजांच्या जयघोषाने आणि भक्तीमय वातावरणाने भाविकांना नवचैतन्याची अनुभूती मिळत असल्याची भावना नीलम खताळ यांनी व्यक्त केली.
गुंजाळवाडी येथे आयोजित अखंड हरिनाम सप्ताहाच्या कार्यक्रमात त्या बोलत होत्या. यावेळी त्यांनी सांगितले की, अशा धार्मिक आणि आध्यात्मिक उपक्रमांमुळे समाजात सकारात्मक विचारांची रुजवण होते. ज्येष्ठांकडून संस्कार, अध्यात्म आणि जीवनमूल्यांचे ज्ञान पुढील पिढीपर्यंत पोहोचते. आजच्या युवकांना योग्य दिशा देण्याचे महत्त्वपूर्ण कार्य अशा सप्ताहांमधून घडत असते.त्या पुढे म्हणाल्या की, स्वामी गगनगिरी महाराजांच्या कृपेने संगमनेरवासीयांना या दिव्य सोहळ्याचा लाभ मिळत आहे. देव आपल्या दारात आला आहे, अशी भावना ठेवून प्रत्येकाने या आध्यात्मिक पर्वात सहभागी व्हावे. भक्ती, श्रद्धा आणि नामस्मरणाच्या माध्यमातून जीवनात सकारात्मक ऊर्जा निर्माण होते.
जनतेने व्यक्त केलेल्या विश्वासामुळे खताळ कुटुंबाला लोकसेवेची संधी मिळाली असून त्या विश्वासाला पात्र ठरत परिसराच्या सर्वांगीण विकासासाठी सातत्याने कार्यरत राहणार असल्याचेही त्यांनी सांगितले. हा सप्ताह कोणत्याही एका व्यक्तीचा नसून संपूर्ण समाजाचा उत्सव आहे. या माध्यमातून समाजात एकता, बंधुभाव आणि सामाजिक सलोखा अधिक दृढ होत असल्याचे त्यांनी नमूद केले.तालुक्यातील सर्व नागरिकांनी या आध्यात्मिक पर्वाचा लाभ घ्यावा, सप्ताहातील विविध धार्मिक कार्यक्रमांमध्ये सहभागी व्हावे आणि भक्तीच्या या सोहळ्याचा आनंद लुटावा, असे आवाहन नीलम खताळ यांनी यावेळी केले.