फक्त ६०० रूपये दराने मिळणार वाळू
अवैध वाळू उपस्याला कायमचा बसणार आळा
युवावार्ता (प्रतिनिधी)
संगमनेर- संगमनेरसह संपूर्ण राज्यात डोकेदुखी ठरलेल्या वाळू तस्करीला आळा घालण्यासाठी राज्यात लवकरच सर्वंकष वाळू धोरण जाहीर करण्यात येईल अशी घोषणा राज्याचे महसूल मंत्री राधाकृष्ण विखे पाटील यांनी केली होती. अखेर या वाळू धोरणाला आज राज्य मंत्रीमंडळाची मान्यता मिळाली आहे. या नवीन वाळू धोरणानुसार नागरीकांना आता केवळ सहाशे रूपये ब्रास या दराने वाळू मिळणार आहे.तसेच अवैध वाळू उपश्याला आळा बसणार असून पर्यावरणाचे ही रक्षण होणार आहे. तसेच अवैध वाळू उपश्यातून अनेक प्रश्न निर्माण झाले होते त्यालाही आळा बसणार असल्याने या धोरणाचे सर्वत्र स्वागत होण्याची शक्यता आहे. मात्र हे धोरण केवळ प्रायोगिक तत्त्वावर एक वर्षासाठी असणार आहे.
राज्यात स्वस्त दराने रेती मिळण्यासाठी तसेच अनधिकृत रेती उत्खननाला आळा घालण्यासाठी नवे सर्वंकष सुधारित रेती धोरण तयार करण्यात आले आहे. या धोरणानुसार प्रायोगिक तत्वावर एक वर्षासाठी सर्व नागरिकांना प्रति ब्रास 600 रुपये (रुपये 133 प्रति मेट्रीक टन) वाळू विक्रीचा दर निश्चित करण्यात आलेला आहे. यात स्वामित्व धनाची रक्कम माफ करण्यात येईल. याशिवाय जिल्हा खनीज प्रतिष्ठाण निधी व वाहतूक परवाना सेवा शुल्क इ.खर्च देखील आकारण्यात येतील. वाळुचे उत्खनन, उत्खननानंतर वाळुची डेपो पर्यंत वाहतूक, डेपोची निर्मिती आणि व्यवस्थापन यासाठी एक निविदा प्रक्रीया राबवण्यात येईल. यातून वाळू किंवा रेती उत्खनन करण्यात येईल. ही रेती शासनाच्या डेपोमध्ये नेली जाईल व तिथून या रेतीची विक्री करण्यात येईल. आज झालेल्या मंत्रिमंडळाच्या बैठकीत या धोरणास मान्यता देण्यात आली. बैठकीच्या अध्यक्षस्थानी मुख्यमंत्री एकनाथ शिंदे होते.
नदी पात्रातील वाळू गटाचे निरिक्षण करण्याची कार्यवाही तहसिलदारांच्या अध्यक्षतेखालील तांत्रिक समिती करेल. जिल्ह्यातील प्रत्येक तालुक्यासाठी उपविभागीय अधिकारी यांच्या अध्यक्षतेखाली तालुकास्तरिय वाळु संनियत्रण समिती स्थापन करण्यात येईल. ही समिती वाळू गट निश्चित करून, त्या गटासाठी ऑनलाईन ई-निविदा पद्धती जाहीर करण्यासाठी जिल्हास्तरीय समितीला शिफारस करेल.जिल्हास्तरीय संनियत्रण समितीचे अध्यक्ष जिल्हाधिकारी असतील आणि या समितीत मुख्य कार्यकारी अधिकारी, पोलीस अधीक्षक किंवा पोलीस आयुक्त, अपर जिल्हाधिकारी, अधीक्षक अभियंता सार्वजनिक बांधकाम विभाग व जलसंपदा विभाग तसेच प्रादेशिक परिवहन अधिकीर, भू-विज्ञान व खनीकर्म विभाग, भूजल सर्वेक्षण तसेच महाराष्ट्र प्रदूषण नियंत्रण मंडळाचे अधिकारी असतील. ही समिती वाळू डेपोमध्ये वाळू साठा उपलब्ध करून घेण्यासाठी वाळू गट निश्चित करतील. तसेच राष्ट्रीय हरिल न्यायधिकरणाच्या निर्देशांचे पालन होईल, याची दक्षता घेईल.
