संगमनेर पालिकेत नवी नेतृत्व फळी, नवे चेहरे, नवे संकेत
युवावार्ता (प्रतिनिधी)
संगमनेर – संगमनेर नगरपरिषदेच्या स्वीकृत नगरसेवकपदासाठी प्रचंड रस्सीखेच असताना जेष्ठ नेते बाळासाहेब थोरात व आमदार सत्यजित तांबे यांनी रचना मनीष मालपाणी, माजी नगरसेवक सोमेश्वर दिवटे आणि जावेद पठाण यांच्यावर विश्वास दाखवत त्यांची निवड करण्यात आली आहे. तर आज सर्वांचे लक्ष लागलेल्या उपनगराध्यक्षपदावर काँग्रेस पक्षाचे जेष्ठ कार्यकर्ते नुरमोहमंद शेख यांची वर्णी लावण्यात आली.
आमदार सत्यजित तांबे यांनी सोमवारी या तिघांच्या व आज उपनगराध्यक्ष पदाच्या नावांची अधिकृत घोषणा केली.
दरम्यान रचना मनिष मालपाणी यांच्या रूपाने मालपाणी परिवारातील सदस्याचे तब्बल साठ वर्षांनंतर नगरपालिकेच्या – कारभारात पुनरागमन झाले आहे. त्यामुळे हा चर्चेचा मोठा विषय ठरला.
संगमनेर नगरपरिषद निवडणुकीत आ. सत्यजित तांबे यांच्या नेतृत्वाखाली संगमनेर सेवा समितला भरीव यश मिळाल्यानंतर स्वीकृत नगरसेवकपदासाठी व उपनगराध्यक्ष पदावर कोणाची वर्णी लागणार याकडे संपूर्ण शहराचे लक्ष लागले होते. अखेर सामाजिक, संघटनात्मक व विकासाभिमुख राजकारणाची दिशा ठरवत या नेमणूका करण्यात आल्या. या संदर्भात माहिती देताना आमदार तांबे यांनी सांगितले की, संगमनेर 2.0 चा जाहीरनामा आणि शहराच्या सर्वांगीण विकासाचे स्पष्ट व्हिजन घेऊन आम्ही निवडणूक लढवली. यावर विश्वास ठेवत तब्बल 70 टक्के मतदारांनी सेवा समितीला मोठा कौल दिला.
या विजयामुळे आमची जबाबदारी अधिक वाढली असून, कार्यकर्त्यांची संख्या मोठी असल्याने स्वीकृत नगरसेवकपदासाठी निवड करणे ही मोठी कसरत होती. त्यातून समन्वयाने मार्ग काढून सोमवारी स्वीकृत नगरसेवकांची निवड करण्यात आली. तर आज पालिकांच्या रामकृष्ण सभागृहात झालेल्या बैठकीत उपनगराध्यक्ष पदासाठी प्रभाग 10 मधून सेवा समितीकडून विजयी झालेले नगरसेवक नुरमोहमंद शेख यांचा एकमेव अर्ज आल्याने त्यांची उपनगराध्यक्ष पदावर निवड करण्यात आली. स्विकृत नगरसेवक झालेले रचना मालपाणी, सोमेश्वर दिवटे व जावेद पठाण यांनी पदाची शपथ घेतली.