प्रवरा–म्हाळुंगी नदीपात्रात महसूल-पोलीस संयुक्त छापा; दोघे रंगेहात अटकेत, आठ जण फरार
युवावार्ता (प्रतिनिधी)संगमनेर – संगमनेर शहराची जीवनवाहिनी असलेल्या प्रवरा-म्हाळुंगी नदीच्या पात्रातून सुरू असलेल्या बेकायदा वाळू उपशावर महसूल विभाग आणि पोलिसांनी संयुक्तपणे जोरदार धडक कारवाई केली. शांतीघाट परिसरात सुरू असलेल्या वाळू तस्करीवर छापा टाकत पथकाने थरारक पाठलागानंतर दोघा तस्करांना रंगेहात पकडले, तर अन्य आठ ते दहा जण उसाच्या शेतातून पळून जाण्यात यशस्वी ठरले.
शांतीघाट परिसरात रिक्षाच्या सहाय्याने अवैध वाळू उपसा व वाहतूक सुरू असल्याची गोपनीय माहिती तहसीलदार धीरज मांजरे यांना मिळाली होती. माहितीची गंभीर दखल घेत त्यांनी तात्काळ कारवाईचे आदेश दिले. त्यानुसार महसूल व पोलीस विभागाचे विशेष पथक तयार करून घटनास्थळी छापा टाकण्यात आला.पथक घटनास्थळी पोहोचताच वाळू माफियांची पळापळ सुरू झाली. मात्र अधिकारी व कर्मचार्यांनी कोणताही विलंब न करता पळणार्या तस्करांचा थरारक पाठलाग केला.
यावेळी सर्फराज रियाज शेख (रा. रहेमत नगर, संगमनेर) आणि सलीम झहीर शेख (रा. संगमनेर खुर्द) या दोघांना पकडण्यात यश आले. इतर आरोपींनी मात्र जवळील उसाच्या शेताचा फायदा घेत पलायन केले.या कारवाईत पथकाने 1,500 रुपये किमतीची अडीच ब्रास वाळू आणि 25 हजार रुपये किमतीची काळ्या रंगाची रिक्षा असा एकूण मुद्देमाल जप्त केला असून तो तहसील कार्यालयाच्या आवारात जमा करण्यात आला आहे. ग्राम महसूल अधिकारी जाफर पठाण यांनी दिलेल्या फिर्यादीवरून संगमनेर शहर पोलीस ठाण्यात दहा जणांविरोधात गुन्हा दाखल करण्यात आला आहे.ही यशस्वी कारवाई तहसीलदार धीरज मांजरे यांच्या मार्गदर्शनाखाली महसूल अधिकारी सचिन बोरकर, प्रवीण आशुतोष वाकडे, अविष्कार थोरात, वैभव गुंजाळ तसेच पोलीस कॉन्स्टेबल खुळे व बेनके यांनी पार पाडली. सध्या पोलीस निरीक्षक समीर बारवकर यांच्या मार्गदर्शनाखाली फरार आरोपींचा कसून शोध सुरू आहे.महसूल विभागाने घेतलेल्या या आक्रमक भूमिकेमुळे अवैध वाळू तस्करांचे धाबे दणाणले असून, पुढील काळातही अशाच कठोर कारवाया सुरू राहणार असल्याचा इशारा प्रशासनाने दिला आहे.
