अत्याधुनिक सुविधांसह डबल स्क्रिन थिएटर प्रेक्षकांच्या सेवेत
युवावार्ता (प्रतिनिधी)
संगमनेर – वॉटरपार्क व थीमपार्कच्या माध्यमातून देशभरात लौकीक मिळवणार्‍या मालपाणी उद्योग समूहाने संगमनेरच्या मनोरंजन क्षेत्रात आणखी एक दमदार पाऊल ठेवले आहे. गेल्या अनेक वर्षांपासून संगमनेरच्या सांस्कृतिक क्षेत्रात जाणवणारी अत्याधुनिक चित्रपटगृहाची पोकळी भरुन काढताना उद्योग समूहाने दोन पडद्यांचा समावेश असलेल्या मल्टिप्लेक्स सिनेमागृहाची उभारणी केली असून शुक्रवारी सायंकाळी विविध मान्यवरांच्या हस्ते त्याचा भव्य शुभारंभ करण्यात आला. संगमनेरात सुरु झालेल्या नव्या मल्टिप्लेक्स सिनेमागृहामुळे चित्रपट पाहण्यासाठी संगमनेरकरांना आता क लोणी, नाशिकची वारीही करावी लागणार नाही.
‘गाय छाप’च्या माध्यमातून अवघ्या देशात परिचित असलेल्या मालपाणी उद्योग समूहाने गेल्या दोन दशकांत वॉटरपार्क आणि थीमपार्कच्या क्षेत्रात मोठी व्यावसायिक क्रांती केली आहे. शिर्डीच्या वॉटरपार्कपासून या क्षेत्रात सुरु झालेला उद्योग समूहाचा प्रवास आशिया खंडातील सर्वात मोठ्या इमेजीका वर्ल्डला वळसा घालून मध्यप्रदेशातील इंदूर आणि गुजरातमधील सुरतपर्यंत जावून पोहोचला आहे.
व्यावसायिक प्रगतीच्या माध्यमातून देशाच्या प्रगतीत मोलाचा वाटा उचलणार्‍या मालपाणी उद्योग समूहाने संगमनेर शहराप्रती असलेल्या संवेदनाही नेहमी जागृत ठेवल्या आहेत.
गेल्या अनेक वर्षांपासून संगमनेरकरांना अपेक्षीत असलेल्या मनोरंजन गृहाची निर्मिती करण्यात आली असून मोठ्या पडद्यावर एकाचवेळी दोन वेगवेगळे चित्रपट पाहण्याचा पर्याय उपलब्ध झाला आहे. या मालपाणी मल्टीप्लेक्स कॉनप्लेक्स या अत्याधुनिक सिनेमागृहाचे उद्घाटन सोहळा अतिशय थाटात साजरा झाला.
आकर्षक डिजिटल आवाज, अंतर्गत रचना आणि भव्य रुपेरी पडद्यावर चित्रपट पाहताना प्रेक्षकांना वेगळी अनुभूती मिळेल असा विश्‍वास मालपाणी परिवाराने यावेळी दिला.
