• Share

अवकाळीचा दणका

विजांचा कडकडाट आणि जोरदार वादळवाऱ्यासह अवकाळी पावसाने रविवारी दुपारी शहरासह जिल्ह्याच्या काही भागांत हजेरी लावली. चांदवड, निफाड, दिंडोरी, इगतपुरी या तालुक्यांत कमी-अधिक प्रमाणात सरी कोसळल्या, तर उर्वरित तालुक्यांत ढग दाटून आले होते. दिंडोरी तालुक्यात वीज अंगावर पडून एकाच कुटुंबातील दोघांसह तिघांचा मृत्यू झाला, तर वेगवेगळ्या घटनांत वीज अंगावर पडून चार जनावरे दगावली. गहू, कांदा, आंब्यासह अंतिम टप्प्यातील द्राक्षांसाठी चैत्रातील या सरी हानिकारक ठरल्या आहेत. मागील दोन-तीन दिवसांपासून ऊन आणि घामाने त्रस्त झालेल्यांना दिलासा मात्र मिळाला आहे. काही ठिकाणी झाडे कोसळून वीजपुरवठा खंडित झाल्याचेही वृत्त आहे. आज, सोमवारी दिवसभर ढगाळ हवामान कायम राहतानाच पावसाची शक्यता हवामान खात्याने व्यक्त केल्याने शेतकऱ्यांच्या उरात धडकी भरली आहे. रविवारी दुपारनंतर निफाड तालुक्यातील विंचूर, नैताळे, उगाव, शिवडी, सायखेडा, चांदोरी, पिंपळस या भागात ढग दाटून आले. चारच्या सुमारास लासलगावसह चांदोरी, लोणवाडी व परिसरात अर्धा तास जोराचा पाऊस झाला. लासलगावला अर्ध्या तासात सात मिलिमीटर पावसाची नोंद झाली. तालुक्याचा पश्चिम भाग लोणवाडी दावचवाडी परिसरातही पाऊस झाला. येवला तालुक्यातील राजापूर, नगरसूल, सायगाव, अनकाई आदी गावांत जोरदार वादळी वाऱ्याने ग्रामस्थांच्या उरात धडकी भरवली. जोरदार वाऱ्याने शेतशिवारात धुळीचे लोट उडाले होते. इगतपुरी तालुक्यातील खेड, वासाळी, भरवीर, मुंढेगाव, गोंदे आदि भागासह घोटी- इगतपुरी दरम्यान तुरळक पाऊस झाला. घोटी, काळुस्ते, आंबेवाडी व पश्चिम पट्ट्यात सोसाट्याचा वारा होता.मालेगाव शहर परिसरात रविवारी सायंकाळी पावसाच्या हलक्या सरी बरसल्या. वाढत्या तापमानामुळे घामाघूम झालेल्या शहरवासियांना यामुळे काहिसा दिलासा मिळाला. चांदवड शहर व तालुक्यात सायंकाळी वादळी वारा, विजांच्या कडकडाटासह पाऊस झाला. मनमाड शहर परिसरातही रविवारी सायंकाळी अवकाळी पावसाने जोरदार वाऱ्यासह हजेरी लावली. यामुळे रविवारच्या आठवडे बाजारात एकच धांदल उडाली. विक्रेत्यांच्या वस्तू भिजल्या. पावसामुळे विजेचा लपंडाव सुरू झाला. सध्या गहू आणि कांदा काढणीचे काम सुरू आहे. त्यामुळे शेतात काढणीस केलेला कांदा झाकण्यासाठी शेतकरी प्लास्टिक, ताडपत्री यांचा वापर करीत होते, तर गव्हाच्या गोण्या भरण्याचीही धावपळ सुरू होती. याशिवाय अंतिम टप्प्यातील द्राक्षबागांचे खुडे अजून बाकी आहेत, त्यामुळे द्राक्षउत्पादकही धास्तावले आहेत.